Cara/o companheira/o,
A Gentalha do Pichel disponibiliza um serviço permanente de Voluntariado pola Língua que poderá ser interessante para o/a departamento/associaçom que diriges. Trata-se de um programa de integraçom humana e lingüística que pode ajudar as pessoas imigrantes que solicitam a vossa colaboraçom a se abrirem um espaço em Compostela.
O funcionamento do programa é mui singelo. Consiste em pôr em contacto pessoas que usam habitualmente o galego com pessoas que nom só nom o empregam, como também tenhem dificuldades para encontrar um ámbito de uso que lhes permita darem os primeiros passos para a avançar na aquisiçom desta língua. Cada par (um voluntário ou voluntária e um/ha aprendente) compromete-se a combinar um mínimo de dez encontros de umha hora (mais ou menos um por semana durante três meses) para que o aprendente poda manter umhas primeiras conversas em galego que lhe facilitem a sua instalaçom na nossa língua.
Para participar no programa, basta dirigir-se à Gentalha do Pichel e dizer que se pretende participar no programa em qualidade de aprendente. Desta maneira, poderemos atribuir a quem se anotar, umha pessoa voluntária para lhe ajudar a dar os seus primeiros passos em galego.
Gostaríamos muito que nos ajudasses a localizar as pessoas que procuramos, às quais temos a certeza de que tu chegarás com mais facilidade do que nós.
